ACH veut dire Apas.
* Acher vn hain, c'est le charger & couurir de poisson, ou autre chose pour pescher.
Aclamper, est ioindre vne piece de bois à vne autre clous, cheuilles ou dordes: ou garnier vne piece de bois, & la fortifier d'vne autre.
Acte du delais, est vn acte par lequel le deteur denonce, & delaisse la perte, & le naufrage à son creancier.
Agreer vn nauire; c'est voir si tous les cordages sont bien garnis, suffisans, & capables de faire le voyage, & generalement signifie, fournir le Nauire de son Funin, Voiles, Canon, Poudre, Bales & Meches, selon le voyage.
Agreilz, ou Sartie, signifie toute sorte d'appareils necessaires à équiper vn Vaisseau.
Agreeur, est celuy, qui passe le Funin, frape les Poulies, oriente les verges, & met tout ce qui est de sa charge en bon ordre.
Aiguade, prouision d'eau douce sur mer: faire Aiguade, est aller puiser, prendre ou faire prouision d'eau douce.
Aiguilles de Tré seruent à coudre les voiles.
Alof, est venir au vent.
Alonge ou Scalme, est vne Courbe de bois, que l'on ente au haut du Genoüil pour alonster, & parfaire la coste ou membre d'vn vaisseau.
Amarer, signifie attacher, & lier fortement quelque chose.
Amateloter, est assigner à chacun quelque personne pour se subuenir les vns les autres, & assister comme freres.
Amener, est le mesme, qu'abaisser; ainsi dit-on, amener les voiles, & amener le pauillon.
Amuler, est pezer à force d'hommes sur les coüetz d'vne voile, pour tenir le poinct de la voile sur le bord, vers le vent.
Ancre, ses parties sont l'argan ou anneau, le ias ou essieu de bois, la verge; les pattes & les oreilles: on ne se sert toutesfois du mot d'argan sur l'Ocean.
Anténe, ou vergue, est vn long bois, attaché de trauers à vne poulie, au haut du Mast d'vn vaisseau, pour soustenir la voile, elles prennent leur nom & difference des masts, ausquels elles sont attachées: ainsi disons nous la grande vergue; la vergue de Hune, la vergue de Perroquet, celles qui se reseruent sur les bords d'vn Nauire, pour les hazards qui peuuent suruenir, se nomment vergues de beille ou matereaux. L'anténe qui se met de trauers l'artimon, se nomme vergue Latine, mais de ce mot on ne se sert que sur la Mediterraneée.
Arbalaite, est vn baston gradué, duquel on se sert pour prendre hauteur; la verge se nomme fleche; les trauers se nomment marteaux. Cét instrument est le mesme que la rayon astronomique.
Aplester les voiles, est les deployer & estendre pour partir, & faire voile.
Argent à profit se baille sur le voyage à tant pour cent, selon le voyage, il court les risques & fortunes de la mer.
Ariue sur la Mediterranée, signifie le costé du vaisseau, qui regarde la riue ou terre.
Arobe entre les Portugais, est la mesure de chair qu'on baille à chacun pour vn mois; elle peze trente liures.
Arriser ou amener les vergues, est durant vne tempeste abattre les vergues sur le vibord, & les attacher le plus ferme que faire se peut, afin de ne donner prise au vent.
Artimon, signifie la voile du mast d'arriere, que les Normans appellent Mizaine.
Assurance est vn contract par lequel on promet indemnité des choses qui sont transportées d'vn pays en autre par la mer, par le moyen d'vn prix conuenu à tant pour cent entre celuy qui fait faire le transport, & celuy qui promet l'indemnité.
Astrolabe, est vn gros cercle de bronze gradué, portant vne alliade ou regle auec ses pinules pour prendre la hauteur du soleil.
Auarie, est toute sorte de depence extraordinaire, dépirance, tare, & dómage arriué pendant le voyage.
Auarie simple, l'vn ou l'autre seulement.
Aubans, sont quatre, six, sept ou plusieurs grosses cordes qui de part & d'autre seruent pour tenir ferme les Masts sur les bords ou sur les hunes d'vn vaisseau, & pour monter aux hunes.
Auictuailleurs, sont les Marchands qui fournissent les victuailles & les choses necessaires pour vser lesdites victuailles; comme bois, chaudiere, plats, bidons: & en outre payent le tiers de la haute somme.
BAlanciens ou valancines, sont cordes qui seruent pour balancer la vergue comme l'on veut, haussant l'vne de ses extremitez, & abbaissant l'autre. *Libratorij antonnæ funes sunt, & libratorij rudentes malum à proca.
Balises ou Boüées, sont panniers ou tonneaux flottans, pieux, masts ou autres addresses, posées aux passages, pour indiquer la droite routte & ses dangers, qu'il conuient euiter & sont necessaires aux Ports de Barre; de là vient le mot de Baliser, & mettre des marques aux lieux & passages dangereux.
Banc, est l'assiette ou siege des Forçats, destinés à vne rame, il signifie aussi vn amas de sable sous l'eau.
Bande, mettre à la bande; c'est faire pancher vn vaisseau sur vn costé, pour nettoyer l'autre.
Barat ou baraterie, signifie toute fraude, maluersation ou deguisement de marchandise, commise par la faute du Patron du nauire ou de l'equipage, dont l'asseureur court risque.
Barques, sont Nauires sans hunes, ainsi que disent quelques-vns: sur l'ocean toutefois elles ont aussi bien leurs masts, hunes & funain, que les Nauires. Et en plusieurs lieux on nomme tout petit nauire, Barque.
Barques en fagot, sont Barques démontées, qu'on porte dans vn vaisseau, pout monter dans les riuieres, & faire trafic.
Barrots, appellez sur la Mediterranée. Ganterias, sont certaines barres de bois, mises au haut d'vn mast pour soustenir les hunes, ou mesme en faire l'office.
Basbord, signifie le costé d'vn Nauire, qui est à la main gauche d'vn homme, qui estant en poupe regarde en proüe. Les Leuantins disent Orse.
Bas de soye, sont barres de fer, où il y a des septs & manottes pour enchaisner ceux qui se comportent mal dans vn vaisseau, ce qui se dit, donner vn bas de soye.
* Bassouins sont cordages desquels les pescheurs se seruent pour attacher leurs seines, les vnes aux autres & faire leurs Tesures, ils sont d'ordinaire de 4. à 5. brasses, on l'amare par le bout sur le halin, & l'autre soutient le Ré.
Baus, sont poutres qui soustiennent les Tillacs & ponts. Celuy qui est à la plus grande ouuerture, & qui ioinct l'extremité superieure d'vn genoüil à l'autre; dans le principal membre d'vn nauire, se nomme Maistre Bau: celuy qui est mis au couple ou membre qui se met sur l'extremité de la quille, vers l'auan, se nomme Bau de l'Equerf, ou Bau de l'of, & à Marseille Madier dernier. Celuy du couple qui se pose le premier vers l'arriere s'appelle Bau de dalle. Le dernier de la pouppe qui se met à angles droicts sur l'Estambord se nomme Lisse de Hourdy. En quelques havres de Bretagne & de Picardie, au lieu de Bau, on dit Banc, ce qui semble plus françois que Bau.
* Belandre, est vne espece de vaisseau vsité en Hollande & basse Flandre, qui a autant de plat que de Bau, & ressemble à vn coffre de 20. à 30. tonneaux, dans lequel on verra vn menage tout entier auec la femme & les enfans, qui n'ayant autre maison vont de riuiere en riuiere pour gaigner leur vie, ils n'ont qu'vn mast en Trinqueté appareillé en Heu.
Berches, sont petites pieces de canon de fonte verte, nommées communément espoirs de fonte. Il y a aussi des berches de fer coulé, que l'ordonnance nomme Barces.
Bidons, sont vaisseau de bois, dans lesquels on donne le boire de chaque plat. Ceux dont nous nous seruons contiennent sept chopines, & on en baille vn pour sept hommes, qui sont vn plat fourny.
Biscuit, est du pain cuit deux fois.
Bites, sont deux pieces de bois, qui soustiennent vne barre qui les trauerse; à laquelle on tourne le cable pour l'amarer, lors que l'ancre est en mer, ce qui s'appelle biter le cable.
Bloc ou teste de More, est vne piece de bois, dans laquelle entre la teste ou extremité du grand mast, & par laquelle passe le mast de hune. A ce mesme Bloc aussi on attache les poulies de la maneuure; qui sert pour dresser ou abattre les Masts de Hune.
Bloc d'issas, voyez sept de drisse.
Bomerie, c'est le contract de prest à haute ou grosse auanture sur le beaumé ou la quille du Nauire laquelle perduë, l'obligation demeure esteinte; le commun dit argent à profit, specialement és costes de Normandie, où on ne se sert point d'autre mot.
Bonnette; est vne petite voyle qui se boutonne au bas d'vne grande, & descend iusques sur le Vibord.
Bonnettes en estuy, sont certaines voiles qu'on met par fois au bout de la grande vergue; à costé de la grande voile, lors qu'on est chassé, ou qu'on chasse sur l'ennemy, és costes de Normandie, on les nomme misaines en estuy.
Bordage: ce mot signifie les planches qui couurent par dehors les costes & carcasse d'vn Nauire, les plus proches de la quille se nomment gaborts.
Bosse, c'est saisir auec vne corde l'ancre contre le bord d'vn vaisseau.
* Boucaut, est vn gros topnneau de hestre, dans lequel on enfonce les voiles ou des victuailles qui de mandent estre en lieu sec, ne pouuant tenir dans les soutes.
Boucle, mettre ou tenir soubs boucle, veut dire soubs clefs ou en prison.
Boudineure, est vne garniture de cordelettes qui enuironnent l'anneau de l'ancre, de peut que le cable ne s'vse contre le fer.
Bouée signifie certains paniers d'oziers, ou tonneaux flottants, qu'on met sur l'entrée d'vn port pour recognoistre la trace nauale.
Bouge ou besson, est la rondeur des baus & Tillacs: proprement ce mot signifie tout ce qui est releué hors d'œuure plat.
Boulines, sont cordes amarées à chaque bord d'vne voile, vers le milieu pour luy faire prendre le vent dit de bouline ou de costé. Ce mot signifie aussi la voile qu'on met de biés du vaisseau pour receuoir le vent qui souste de costé & aller ainsi à la bouline.
Bourgeois du Nauire sur l'Ocean, Sennor de la nau, sur la Mediterranée, est le proprietaire du Nauire. *Parrochus.
Boussole, est vne boëste balancée sur quatre piuots, en laquelle est vne aiguille frotée u'aymant, qui soutient vne roze de carte, diuisée en trente-deux vents ou runs, suspenduë sur vn piuot: plusieurs l'appellent compas ou quadran de mer. Le Nort est representé par vne fleur de lis, l'Orient qu'ils nomment Est, par vne croix, l'Occident qu'ils appellent Ouest, par vn aigle à deux testes: sur l'Ocean toutefois on ne met d'ordinaire que la fleur de lis.
Brailler le haren, c'est le saupoudrer de sel & le remuer auec des pelles.
Brayes, signifie vn cuir ou toille poissée qu'on met au pied d'vn Mast pres du Tillac, de peur que l'eau, qui coule le long du Mast, s'arrestant là, ne le pourrisse: on en met aussi à l'ouuerture du gouuernail.
Bras, sont cordes qui seruent pour croiser les vergues & les faire aller de costé & d'autre, demeurantes toûjours paralleles au Tillac, chaque vergue a ses bras particuliers.
Brayer ou spalmer, est oindre vn vaisseau de bray ou poix, de goudran, & de suif, ce qui se dit aussi suifuer.
Breuet que le vulgaire des Matelots dit cognoissement, est vn escrit soubs signe priué pour marchandise particuliere, dite passagere, qui n'occupe tout le vaisseau.
Breüils, martinets & garcettes, sont petites cordes dont on se sert pour breüiler, ferler, & serrer les voiles.
Brigantin, est vn petit vaisseau de course, armé en guerre. * nommé par les Latins Paron est que nauigij genus à Pariis excogitatum. Myoparon aliud in Myunte, & Paro Insulis inuentum quo vtebuntur Piratæ.
Brisants, sont rochers cachez sous l'eau, representez dans les cartes marines auec de petites croisettes.
Bouchin est le lieu, où se met le premier membre, ou maitresse coste, qui donne au Nauire sa plus grande largeur.
Butin, voyez pillage & en quoy l'vn differe de l'autre.
Cabestan, est vne machine, laquelle tournant en rond auec barres & leuiers, enfile les cables, leue les ancres & autres fardeaux. Enuoyer les pages au cabestan, est les enuoyer au lieu où on les doit chastier.
Cage, Gabie, Hune, est vne echauguette faite en cage à la cime du Mast d'vn vaisseau.
Cale ou fonds de cale, signifie tout le creux du Nauire, depuis le franc Tillac iusques à la calingue.
Caler, signifie abaisser, il signifie aussi ietter en mer vn homme du bout de la grande vergue, attaché à vne corde par le corps, ce qui s'appelle donner la cale.
Calfarer ou calfeutrer, est garnir les fentes & iointures d'vn vaisseau d'estoupes & pois.
Calfat est celuy qui calfeutre. Calfatin est le valet du calfutreux.
Calibre, est l'estenduë ou diametre de la bouche d'vn canon.
Calingue ou Carlingue, est vne piece de bois qui regne tout le long du vaisseau sur les varengues, opposée à la Quille, sur laquelle elle est clampée, plusieurs l'appellent Contrequille: le pied du Mast s'enchasse dans vn trou quarré de la calingue, qui luy sert comme de base.
Canade entre les Portugais, est la mesure de vin ou d'eau qu'on baille à chacun de l'equipage par iour, la pipe en contient trois cents.
Cap, signifie plusieurs choses. 1. vne pointe de terre ou rocher qui auance en mer. 2. l'epron qui est en la proüe d'vn Nauire: mettre le cap au vent, est dresser la proüe d'vn vaisseau du costé d'où vient le vent; où est le cap, demande souuent le Pilote à son gouuerneur; veut dire, à quel run de la boussole est parallele, la quille du vaisseau. Faire cap à la flotte; c'est à quoy est tenu le Capitaine conducteur de flotte, marchant en teste de ceux qu'il conduit.
Cape, signifie la grande voile: mettre à la cape, signifie mettre le costé du Nauire vent & porter la grande voile au lict du vent s'il est possible: mettant le gouuernail sous le vent, & le faisant paralelle à la grande voile.
Capion de proüe, voyez estable.
Caps de Mouton, sont pieces de bois en ovale, ferrées à l'entour; les vns sont affichez à certaines barres de fer, au droit des escotards, & par ces barres de fer, au corps du nauire; les autres tiennent aux Aubans.
Caliorne, est vn gros funin amaré sous les hunes du grand mast de Borcet, sur lequel il y a vne grande poulie, par laquelle passe vn funin ou corde auec vne poulie: on s'en sert pour esleuer les plus grands fardeaux.
Candelette, est vne espece de palan, dont on se sert pour baisser l'ancre, & la mettre en son lieu.
Capuer du hareu, c'est luy couper la gorge, & luy arracher la quigne, & les entrailles ou breuille.
Caramoussats, sont vaisseau marchands de Turquie, qui ont la poupe fort haute.
Carauane, course sur mer de nouueaux Cheualiers de Malte, par voye d'apprentissage, & d'acquit de leur preuue au seruice deu à l'Ordre.
Carraques ou Naos en Portugal, sont vaisseaux ronds de combat & de port de 1500, ou 2000. tons neaux, qui vont chaque année aux Indes: elles ne different de leurs grands Nauires, sinon qu'elles sont plus capables, plus estroites par en haut, & ont sept ou huit plachers, en sorte qu'on y loge parfois 2000. hommes, elles sont d'ordinaire remplies de briques entre deux tables.
Carraquon, est vne petite Carraque.
Carauelles, sont vaisseaux Portugais ronds de mediocre qualibre, comme de cent ou deux cens tonneaux à voiles Latines, ou à oreilles de lievre, qui sont d'ordinaire legers à la voile.
Carene, signifie & la quille, & les flancs, & le fonds du vaisseau, trempant dans l'eau.
faire Carene, c'est tourner & coucher tellement vn vaisseau sur le costé, que la quille ou carene paroisse pour receuoir le radoub, ce qui dit mettre le nauire en carene.
Cargues, sont cordes à ferler ou deferler les voiles.
Cargue on ferle le Borcet, signifie trousse, serre & plie la voile de borcet. Ce mot en quelques endroits signifie aussi arreste.
Ciuadiere, est la voile du mast de Beaupré.
Cartouche, est vn appareil de Canon fait de toile, parchemin ou gros papier en rond de la grosseur de la bale, de la piece à laquelle on s'en veut seruir, contenant la charge de poudre de ladite piece, fermée par les exremitez d'vn rondeau de mesme matiere.
Charte partie, c'est la lettre de facture ou le contract de carguaison fait par escrit, de main publique; en laquelle les capitaines, & rous ceux de l'equipage confessent auoir receu vn tel nauire, bien & dument calfuté, estanché, victuaillé, munitionné & agréé, pour faire quelque voyage; & ce autant que partir.
Chasser sur quelqu'vn, c'est le poursuiure comme ennemy. Chasser sur son ancre, c'est lors que la tempeste pousse si violemment le nauire vers la coste, que l'anchre perdant sa prise, suit le vaisseau.
Chausses, en quelques endroits, signifie le present, ou pot de vin que le Marchand chargeur donne au maistre pour luy, & pour distribuer à ceux qu'il appartiendra.
Chaintes, sont certaines bandes de bois, espoisses & solides, qui ceignent & enuironnent tout le nauire: pour affermir les tillacs, & faciliter aux matelots le moyen d'entrer dans vn vaisseau.
Chiorme ou Chiourme, sur la Mediterranée, signifie premierement le lieu où les forçats tirent à l'auiron dans vne galere, & secondement il signifie toute la bande de ceux qui voguent, soit Turcs, soit forçats, soit volontaires, qu'ils appellent Donnevoilles.
Chappelle, faire chapelle, est lors qu'vn nauire estant trop prest du vent, fait vn tour, & reuire pour prendre le vent; ce mot signifie aussi le petit chaperon d'airain, qui est au milieu de la boussole, & la soustient balancée sur son piuot.
Cinglage, signifie parfois le loyer des gens de Marine; d'autrefois le chemin qu'on croit qu'vn vaisseau fait en vingt-quatre heures.
Clapets, sont morceaux de cuir fort, posez au bas de la pompe, pour tirer, & comme laper l'eau dans la pompe.
Clamps, sont pieces de bois liées sur vn mast ou verge pour l'affermir: & tel mast est dit reclampé.
Clefs, sont certaines cheuilles quarrées, qui passent par le pied du mast de hune, pour l'arrester sur les barrots, & qu'on oste lors qu'on veut deualer les masts de hune: En quelques vaisseaux on ne se sert que de coings de bois pour cét effet, tant és masts de hune qu'és perroquets.
Cognoiscement, est l'escrit par lequel le Maistre du vaisseau confesse auoir chargé telles marchandises dans son bord.
Collier de leté, est vne grosse corde, garnie de cordelettes, iointe à l'extremité de leté, & qui accole le pied du mast opposé.
Commis ou Escriuain, est celuy qui paye les salaires, & appoinctements de tout l'equipage, & tient registre des personnes, viures, munitions, & de tout ce qui se passe dans le voyage, & de tout ce qui enre ou sort du vaisseau.
Compas de mer, voyes boussole.
Congé, est la permission de nauiger, on le nomme en Bretagne Brieux, & la reception, parler aux Hebrieux, & se donne aux subiets passeport, aux amis seureté, aux ennemis sauf-conduit.
Contrebande ou marchandise de contrebande sont marchandises ou autres choses qu'il est defendu par les loix d'vn Estat d'enleur sans congé exprés du Prince.
Conuerso, chez les Portugais, est la partie du tillac d'enhaut, qui est entre le grand mast, & le masts de borcet, où chacun se visite ou conuerse auec qui il veut.
Coste, riuage de mer.
Cotonnine, est vne toile, dont les Marseillois font leurs voiles, dont la chaisne est de coton, & la trame de chanvre.
Coüets, sont cordes simples, qui seruent à tirer & amener les voiles vers le vent.
Contremaistre, est celuy qui commande sur l'auan d'vn vaisseau; les autres nations l'appellent second Maistre.
Contrequille est vne longue piece de bois, esgale, & opposée à la quille, qui luy sert à tenir les varengues & couples en estat.
Coulée, est vn adoucissement qui se fait au bas d'vn vaisseau, entre les genoüils & la quille, afin que le plat de la varenguer ne paroisse tant, & que l'eau coupée par la proüe du nauire coule, glisse & s'eschappe plus doucement par la poupe, qui va s'estrecissant insensiblement.
Couples, sont costes ou membres d'vn nauire, ainsi dites, parce que ceux qui s'esloignent esgalement de la principale coste, sont esgaux, & croissent ou decroissent couple à couple esgalement.
Coursie, passage de proüe à poupe de la galere, entre les rangs des forçats.
Coursiere, pont de coursiere, pont leuis, & couuert dés le gaillard, iusques au chasteau de proüe, seruant pour le combat.
Coursiers, sont canons de batterie, qu'on met és galeres sur la courcie, la bouche tournée vers la proüe.
Cran, mettre vn vaisseau en cran, c'est à dire le mettre sur le costé dessus quelqu'autre vaisseau, qu'on a exprés, & ce afin de le calfader ou le suifuer.
Creux ou pontal d'vn vaisseau, est la distance ou hauteur que est entre les bans, & les varengues. Il se prent parfois pour le sein d'vne voile, qui reçoit & enferme le soufle du vent.
Cuirs verds, sont cuirs qui ne sont preparez, mais tels qu'ils sont tirez de la beste.
Dalot, est vn canal qu'on met és grands vaisseaux, sous le premier ou second tillac, pour conduire les eaux de la pompe.
Darcine sur la Mediterranée, est vn lieu ou havre interieur, où les galeres se retirent en hyuer. Sut l'Ocean on appelle ces lieux, retirez du grand Port, ausquels les nauires sont plus en asseurance, Paradis, Chambre, Bassin.
* Dé est vn rond de fer ou de bois cloisé sur le bout d'embas du leuier ou barre, & ajusté au bout du timon pour le faire joüer & conjoindre l'vn à l'autre.
* Digon est la pointe & partie de la poulaine qui auance hors le nauire en forme d'éperon, composée de deux pieces de bois, entre lesquelles se met vne frise d'vne largeur de planche, ce digon est supporté de la courbe de gorge & porté en son extremité, le Bestion ou marque du nauire, tel qu'est vn lyon, vne leurette, &c.
Drege ou chausses de drege, sont instruments de pesche, deffendus par l'Ordnnance.
Droguerie, voyes haranguaison.
Drisse, voyes Issas.
Dune, proprement signifie vague, & est le mesme que les Espagnols nomment Ola; & nous autres Oule ou Houle. Les Flamans appellent Dunes les costaus de sables, qui empeschent que les vagues n'entrent sur terre. Les Anglois nomment Dunes la rade, qui est depuis Douure iusques au cap du Nord.
Dunette, est le plus haut lieu de la poupe, où est la chambre du Maistre, & du Pilote, sur celle du Capitaine; c'est de ce lieu comme du plus eminent qu'on peut de loin descouurir les Dunes ou vagues, ou les voir à plaisir, sans en estre incommodé.
Drosse, est vne corde qui perce l'affust sur la culasse du canon, & tient des deux bouts aux boucles du Sabord.
Desranger la bonnette, est la desboutonner du corps de la voile.
Ebe, est quand la mer retourne.
* Embelle est le lieu le plus bas & découuert du vaisseau au droit du maistre couple & du grand mast, & le lieu où est l'abaissement de la tonture, qui de là commence incontinent à se releuer auant & arriere.
* Emblier est le mesme que occuper & tenir beaucoup de place.
Encoqueure ou emboisture se fait aux extremitez de l'antenne, pour y mettre les bras de la grande voile.
Encornail, est vne demie poulie, qui est entaillée dans le milieu de la teste du grand mast, au dessous de la hune, & aux deux extremitez des masts de hune, par lequel passe la maneuure, auec laquelle on hausse ou baisse les masts de hune.
Enculement ou la Stella, est la quantité de combien chaque couple à proportion qu'il s'esloigne du milieu, s'esleue sur la quille plus que la maitresse coste.
Enuerger les voiles, c'est les faire attacher aux verges ou antennes.
Equipage, sous ce mot sont compris Officiers, Matelots, & Garçons.
* Equippet est vne forme de coffret de quatre bouts de planche cloüez contre bord entre deux sabords pour mettre les bales propres du canon qui y est arresté.
Epicer vne corde, est la defiler pour l'entrelasser, & conioindre auec vne autre corde.
Escales, sont les Ports où le Nauire aborde pendant le voyage auant qu'arriuer à son terme, qu'ils appellent lieu du reste.
Escore signifie vne coste à pic, ou riuage haut & taillé à plomb: estre en escore est auoir le bord de la coste, releué & taillé. * litus abruptum, proruptum ripæ labrum excludit naues.
Escores, sont aussi des etais, ou des etançons, soutenants le Nauire tandis qu'on le fabrique, ou qu'on le refait. * noualis fabricæ conterij.
Escotard, est vne planche de bois large & espoisse, posée de part & d'autre, tant sur l'autant que sur l'arriere des bords d'vn vaisseau, au droit de chaque Mast, afin d'esloigner les Aubans dudit bord: d'autres & plus à propos les appellent portaubans.
Escoutes, sont cordes doubles qui tirent le bout de la voile vers l'arriere, seruent à tenir le vent dans les voiles, & empescher qu'il ne les emporte.
Escoute de Hune est l'extremité de la grande vergue, à laquelle s'attache l'extremité de la voile de Hune.
Escoutilles, sont grands panneaux, par lesquels on ouure les ponts & Tillacs pour desecendre ou tirer de grands fardeaux d'vn vaisseaux.
Escoutillon, est vne ouuerture quarrée, qui est dans les escoutille, par laquelle on sort, & deualle dans vn vaisseau.
Escouuillon, est vn refouloir, enuelopé par le gros bout d'vne peau de mouton, pour nettoyer & rafraicher vne piece de canon.
Escubiers, sont de gros trous posez de part & d'autre sur l'auan du nauire, par lesquels les cables passent, & filent en mer; à Marseille on les nomme Oeuils.
Escueils, sont bancs de sable ou de grauier, representez dans les Cartes auec de petits poincts.
Espale est le banc de espallers ou rameurs, proche de la poupe.
Esperon, est le bec d'vn vaisseau, qui auance sur la proüe, dessous le beaupré. On le nomme d'ordinaire pouleine, & les Latins Rostrum.
Espoirs, sont fauconneaux, ou petites pieces de bronze, qu'on loge dans les grands vaisseau sur les hunes, comme il se void és Caraques de Portugal, ou bien sont montez sur le pont, dont on se sert aussi parfois, quand on fait quelque descente en terre.
Estable, Estraue, ou Estante, que les Italiens nomment Rota de Proda, & nos Marseillois Capion de proüe, est vne courbe de charpente, qui s'ente au bout de la Quille, & montant en haut forms la proüe du Nauire: elle est d'ordinaire composée de deux pieces, dont l'vne, sçauoir celle d'enhaut, s'appelle le Brion, l'autre simplement l'Estable.
Estambres, sont deux grosses pieces de bois, qui accolent le trou du Tillac, par où passe le mast, & le tienne ferme & arresté.
Estambor ou Capion de poupe, est vne piece de bois droite, qui s'ente sur l'extremité de la Quille à angles obtus, pour bastir la poupe du vaisseau. A cét estambot est attaché le Gouuernail.
Estambraye est vne toile poissée, qu'on met tout autour des mats, sur le plus haut tillac, de peur que l'eau ne pourrisse le mats.
Estay, est la plus grosse corde de toutes les maneuures, qui accolant le mast par en haut sous la Hune, vase terminer au pied du mast opposé. Son office est d'affermir le mast, & faire qu'il ne tombe en derriere, sur la poupe, quand on isse la grand voile, & soustenir diuerses autres maneuures.
Estime, est vn iugement probable que le Pilote fait du lieu où est arriué le Nauire: du nombre des lieuës qu'il a fait depuis vn tel lieu, ou de combien il est distant de quelque endroit.
Etier és marais salans, est vn canal à receuoir l'eau de la mer pour y faire le sel.
* Etoché veut dire amoindri.
Etrope ou herse de poulie, est vne corde qui faisit vne poulie, & la tient ferme en quelque endroit.
* Euitée de nauire est l'espace ou largeur que auoir vne riuiere, afin qu'vn vaisseau y puisse non seulement entrer, mais encore s'y tourner sans se gaster touchant les riues.
Falaises, sont roches ou terres esleuées sur le bord de la mer.
Falouque, est vn vaisseau de bas bord à cinq ou six rames de chaque bande, le moindre de tous les vaisseaux à rame.
Fanal, est vne grande lanterne allumée sur l'arriere du vaisseau admiral, pour signal de la route que doiuent tenir les vaisseaux suiuants.
Ferler, signifie plier & serrer, par exemple, ferler les voiles, ferler le pont de cordes.
* Fermer l'Estable est l'ainster auec son brion.
* Ficheleu, est le plus ieune garçon d'vn basteau pescheur, qui assiste le cuisinier, tant au soing de la chaudiere, qu'à jetter les filets en mer, qui est leur propre office.
Figures ou enflecheures, sont cordes qui trauersent les Aubans, & enfont comme vne eschelle pour monter aux hunes.
Ferze de cotonnine, est vne laise de toile faite en partie de coton: On se sert sur la Mediterranée de ce mot, disant ceste voile a tant de ferzes, & chaque ferze a tant de cannes, voulant exprimer la largeur & hauteur d'vne voile.
Flot, signifie le commencement de la marée & tant qu'elle monte, iusques à ce qu'elle soit pleine: Et pour lors on dit qu'il est pleine mer, puis quand la mer refoule, ou s'en va, on la nomme l'Ebe.
Flote, est vn nombre de nauires allans de compagnie.
Fons de cale, est l'espace qui est sous le tillac inferieur.
Fosse à lion, est vne chambre entre les masts de mizaine & les bites, où loge le Contremaistre auec ses gens, & où il retire les cordes pouliées & autres choses qu'il a en sa charge.
Fouesnes, sont instruments pour pescher à quatre ou cinq piquants, amanchez au bout d'vn baston.
Foubers, sont gros bastons, au bout desquels il y a toille ou cordages espices, qu'on trempe en mer pour nettoier le vaisseau.
Fourgs ou Sanglons, sont pieces de bois triangulaires qui se posent sur la troisieme partie de la Quille vers l'arriere, au lieu de varangues: l'vne des extremitez pose sur la quille, & les deux d'enhaut se marient auec des genoüils qu'ils appellent de Reuers, parce que cette piece de bois n'est toute circulaire comme les autres genoüils: mais partie renuersée en dehors.
Foyer ou sougon, est le lieu où on fait le feu dans le nauire.
* Fourchettes sont courbes à fausse equerre, iointes contre le bord de l'auant d'vn vaisseau pour affermir la fleche & digons de la poulaine.
Fregates, sont petits vaisseaux armez en guerre qui vont à rames & à voiles, propres à descouurir & porter nouuelles.
Frez, signifie vent, bon frez bon vent. Il afreschit, il commence à faire vent.
Frisons, sont chopines d'airain ou de terre cuite pour tenir boisson: En Normandie on les fait d'estain & contiennent deux pots.
Fret, fretement ou afretement, est le loüage du Nauire, le Maistre frette, le Marchand chargeur afette, le prix est le fret, les Leuantins disent le nolit.
Funin ou cordes, c'est la mesme chose.
Gabari, c'est le modelle des couples ou membres d'vn vaisseau.
Gabarres, sont vaisseaux de seruice pour charger & descharger les grands.
Gabi, à Marseille est l'arbre de hune, & Gabie signifie la hune ou cage.
Gabords, sont les planches du bordage, les plus proches de la quille.
Gaburons sont pieces de bois qu'on attache & lie etroittement au grand masts pour le fortifier, lors qu'il n'a sa grosseur requise, ou est foible en quelque lieu.
Gaffes, sont instruments pour pescher.
Gaillard est le chasteau de poupe & lieu de defense, releué sur la poupe poue vn combat de mer.
Galands, sont certaines aubans des mats de hune, ou de perroquet, qui deualent iusques sur les bords du nauire; d'autres les nomment galobans ou galebans.
Galoches, sont deux trous dans les escoutilles, par lesquels passent les cables.
Gamelles, sont plats de bois à mettre la pitance.
Garant, est l'extremité d'vne corde: par exemple, d'issas, ou des palans, sur laquelle plusieurs hommes se mettent pour hausser ou abaisser quelque pois.
Gardes, sont trois Estoilles, posées en ligne droite, dont les principales, sont les deux anterieures de la petite Ourse. Les matelots s'en seruent pour cognoistre de combien l'estoille de la mer, est plus haute ou basse que le vray Nord.
Gardes-costes, sont vaisseaux de quatre à cinq cents tonneaux, establis du public pour la seureté des costes & havres, pour tenir la mer libre, seruir d'escorte aux Marchands, & pour empescher le transport de l'or & argent & autres marchandises de contre-bande.
Gardiennerie, est la chambre des Cannoniers, elle est en la poupe sur la soute & sous la chambre du Capitaine: on l'appelle à Marseille chambre de sainte Barbe, parce qu'elle est Patronne des Cannoniers.
Garcettes, sont menuës cordes, destinées à saisir & trousser les voiles.
Gemelles voyez gaburons.
Genoüil ou stamenai, est vn segment de cercle courbé de part & d'autre, en forme de genoüil qui se ioinct en bas au costé de la scoue de la varengue, & en haut à son alonge, & à son bau. C'est la principale partie de la coste d'vn vaisseau.
Gindant, est la hauteur de la voile.
* Giot, est la barre du gouuernail d'vn basteau ou d'vne chaloupe.
Golphe, est vne partie de quelque mer qui entre dans les terres.
Gonne, est vn vaisseau plus grand d'vn quart qu'vn baril.
* Gourbiage, est vne entailleure faite dans le bois auec vn ciseau.
Gourmettes, en Portugal, sont les valets du nauire qui seruent à toute sorte de trauil, tant dedans que dehors le nauire, specialement à nettoier le vaisseau, tirer à la pompe, haler sur les cordes, sans toutesfois iamais aller au gouuernail ny en haut: il y en a tousiours plus que de Mariniers.
Grands temps, est vn temps fascheux, auquel la mer est grosse, les vagues hautes, les vents impetueux, violents, & accompagnez de tempeste.
Gouuerneur, par ce mot on entend en France le Matelot, qui tient à son tour, & selon son ordre la barre du gouuernail.
Guinder, est esleuer enhaut.
Action de Guindage s'intente par les compagnons du nauire, qui aydent à la descharge d'iceluy.
Habitacle ou gesole, sont trois niches, ou armoires, qui sont au pied du Mast d'artimon: en l'vne est la lumiere, en l'autre la boussole, en la troisiesme, le poudrier ou horloge.
* Halins, sont cordages dont les pescheurs se seruent pour attacher au bord d'vn vaisseau leurs Tesures, ou pour le haler auec le Cabestan.
Hanciere, est vne corde sur laquelle les Mariniers halent le long du bord de l'eau, pour faire entrer, ou sortir vn vaisseau hors du Havre: Elle signifie aussi le cable du plus petit ancre, & les cordes qu'on iette aux chaloupes, qui abordent, & celle dont on amare l'esquif.
Colier de Hansiere, est vne corde ou sangle pendante en écharpe du col de ceux qui halent ou tirent.
Haranguaison, est le temps du passage & pesche du haran.
Harpons, sont des tranchants mis au bout des verges, faits en forme de S. pour couper à l'abord les cordages de l'ennemy, à Diepe on les appelle Cerpes.
Havre de barre ou de marée, est vn port où on ne peut entrer que de haute mer.
Havre d'entrée, est vn port où il y a de l'eau suffisamment pour entrer en tout temps.
Haute somme, est la despence qui ne regarde ny le corps du Nauire, ny les loyers des hommes ny les victuailles: mais ce qui s'employe au nom de tous les interesses, pour le dessein entrepris, par exemple, Enuoyant vn vaisseau à la pesche sur le grand banc, ou en droguerie, ou au cap verd, on a besoin de sel, de filets, de marchandises à troquer: à tout cela chacun des interessés, au voyage, contribuë pour sa quote part. D'ordinaire à Diepe, les Bourgeois & proprietaires du Nauire fournissent les deux tiers de la somme; le Maistre du Nauire & ses compagnons fournissent l'autre tiers.
* Herpes, sont certaines lisses de la pontaine, affermies sur la pointe du digon, qui vont s'eslargissant saisir le bord du vaisseau, où elles sont cheuillées.
Herse de poulie: voyez Etrope.
* Herler, d'où est le bord, est crier & demander d'où est le nauire.
Hinse, Hance, l'ordonnance vse de hance theutonique, qui est la perticipation des priuileges donnez aux Marchands d'Allemagne, traffiquans és quatre Villes de ladite Hance ou alliance, sçauoir Bruges en Flandres, Londres en Angleterre, Berge en Nouergue, & Nouogrod en Russie.
Houage, Seilleure ou Aiguade, est l'Erre, voye, Seillon & trace qui paroist en l'eau, apres que le Nauire a passé.
* Houaré veut dire serré à bord.
Houle, sont vagues d'vne mer agitée, voyez Dune.
Houars, est la longueur de trois halins, qu'on file pour éloigner le filet du basteau, depeur qu'il ne se meste, & que la vague ne le iette sur le halin.
Hourdes, sont des trous percés en larmes dans vne planche d'vn basteau, pour y passer les rames.
* Horne, veut dire vne partie qui sort dehors.
Hourdy ou Lisse de Hourdy, est le dernier des baus de la poupe, qui se met à angles droits sur l'estambord.
Hune, est vn panier large & rond, posé à chaque briseure d'vn mast, & de laquelle le mast prend son nom. Par example, le mast de hune du grand mast: le mast de hune du borcet, &c. Sur la Mediterranée on l'appelle Gabie.
Huter, c'est de grand temps, croiser les grandes vergues auec le mast, en amenant l'vn des bouts iusques sur le vibord, ou on l'attache fermement, afin que le vaisseau ne se tourmente pas tant, & que roulant, le poids de la vergue ne se iette tout d'vn costé.
* Iack, sont vaisseaux de guerre de l'Inde.
Iar, est vne mesure de quarante pintes d'huile, on enuiron.
Ias, est l'essieu de bois d'vn ancre.
* Iaumiere, est vn trou percé dans la planche du voutis de l'arriere d'vn vaisseau, par lequel passe le bout du thimon dehors dans la teste du Gouuernail.
Ieu party, ou faire jeu party, est lors que l'vne des personnes ayant part en vn vaisseau, demande en iugement que le tout demeure à celuy qui sera la condirion de l'autre meilleure: & ne voulant plus demeurer en societé auec vn autre, le mer en action pour faire jeu party (Ius partium) c'est à dire, donnez moy tant pour ma part, ou ie vous donneray tant de la vostre; ou bien on sera estimet les parts.
Isser, est leuer les verges pour partir. Les anciens se seruoient aussi de ce mot sur terre, comme Issant du logis, d'où vient Issu, & Issue.
Issas, est vne corde amarée au pied du mast, au bloc d'Issas, dont on se sert pout hausser ou baisser la verge: l'extremité de cette corde a des garands, sur lesquels on tire.
Itacle, est vne corde qui saisit la verge par le milieu, & va passer par l'encornail, pour guinder les volies. En quelques endroits on les nomme Estagues.
Lamaneurs, Lormans, ou Lomans, sont Pilotes de Havres & riuieres, qui se loüent à mener, toüer, & conduire le nauire en Rade, ou le faire entrer dans le Havre: le trauail de telles gens se nomme menu Pilotage, Toüage, Lamanage: Action de Lamanage, est celle que les Lamaneurs intentent pour estre payez de leur salaire.
Lest, chez les Anglois, & Flamans, signifie vn poids de quatre mille liures, & est le mesme que deux tonneaux de France: En Suede, & Moscouie, ils se seruent pareillement de ce mot, & en ont de deux sortes: car le grand Lest, en ces quattiers vaut douze tonneaux de France, & les petits n'en valent que six. En France on ne se sert de ce mot que pour signifier le sable, caillou ou autre chose qu'on met au fond du vaisseau, afin que la partie la plus pesante du vaisseau estant en l'eau, le vaisseau par sa propre pesanteur se tienne droit.
Libouret, est vne espece de ligne à pescher maquereau, qui a deux ou trois pilles, ou petites cordes, esquelles est attaché l'ain, & l'apas.
* Lime de marée est l'escume des bords de la mer & des havres, que le marée se retirant emptore.
Linguet, est vne piece de bois, attachée sur le tillac, pour arrester le cabestan, de peur qu'il ne destourne, & desuire.
Lignes, sont cordeaux longs, destinez à la sonde.
Lof proprement, est la partie du vaisseau, qui est depuis le mast, iusques à l'vn des bords.
bouter de Lof, est mettre les voiles en escharpe, pour prendre le vent de costé.
estre au Lof, signifie auoir sur vn autre le dessus de vent.
Loquets, sont barres pour fermer escoutilles, cabanes, & choses semblables.
Lot, est la partie & portion que chasque homme d'vn vaisseau doir auoir, les auaries leuées.
* Lonendreu, est celuy qui est au fond du basteau pour tirer les filets bas, & les parer en sorte qu'ils soient tous prests à jetter quand le temps sera beau.
Louue, est vn baril defoncé mis sur l'vne des escoutilles dans les nauires de Terre-neufue, par lequel passent & tombent toutes les moruës lors qu'elles sont habillées.
* Louue, est vne baril defoncé mis sur l'vne des esoutilles dans les nauires de Terre-neufue, par lequel passent & tombent toutes les moruës lors qu'elles sont habillées.
Louier, est voguer quelque temps d'vn costé, puis virer le nauire, & aller autant de l'autre, afin de ne s'esloigner beaucoup de quelque endroit ou parage.
Lumiere, est vn canal qui regne tout le long de la quille, sous les varangues, & fourgs, par lequel l'eau qui entre dans le vaisseau, se rend à la pompe.
Maistre ou Patron, est celuy qui commande aux voiles d'vn vaisseau, & generalement à tous les gens d'vn vaisseau. Sur la Mediterranée on le nomme Nocher.
Maistre Dache en Leuant, est le Maistre Charpentier, qui conduit la besongne. Calfats, sont les Compagæons Charpentiers. Calfatins, sont les Apprentifs ou Valets.
Maistre Valet, est le depansier general du Nauire.
Maneuure, est vn nom general, qui signifie toutes les cordes qui seruent à vn nauire, excepté les cables & hansieres.
* Maquilleur, est vn basteau de simple tillac, qui va à la pesche du maquereau.
* Marée qui porte au vent, & lors que la mer roule contre le vent.
* Marée d'aual, le vent est celle qui roule auec le vent.
Marchandise de contrebande, sont celles que les loix de l'Estat deffendent d'enleuer de quelque pays.
Marticles, sont petites cordes qui embrassent les voiles quand on les veut serler.
Masts, sont quatre dans vn nauire, & parfois cinq: Le grand mast, s'appelle à Marseille l'Arbre de Maistre: La Mizaine ou Borcet nommé de quelques-vns Mast d'auant materel, & tringuet és petits vaisseaux. Le Beaupré, qui est couché sur l'esperon de la proüe. L'artimon ou mast de foule, qui est droit sur la poupe, & parfois contremizaine, ou petit artimon, qui est encores plus arriere. Chacun de ces masts se brise en deux ou en trois: la premiere briseure s'appelle mast de hune, la seconde, mast de perroquet. Si vn mast est renforcé de clamps ou gemelles, & partie d'autres masts, on le nomme masts reclampé ou renforcé, gemelé ou surlié: s'il est enté par haut, on le nomme mast afusté. Les petits masts qui se posent sur le Beaupré, & sur l'artimon, ne s'appellent masts de hune, d'artimon ou de Beaupré, quoy qu'ils ayent des hunes, mais perroquet d'artimon, ou perroquet de Beaupré.
Matelot, signifie proprement tout homme qui fait prosession de hanter la mer. Secondement celuy que le Capitaine assigne à vn chacun pour l'assister en toutes ses necessitez, vif & mort. Ainsi auons nous accoustumé de dire, vn tel est mon Matelot.
* Manture, est vn grand coup de vent.
Mer proprement, est vne partie de l'Ocean, qui prend son nom des terres qu'elle arrouse.
Mesche, est vn gros tronc ou arbre, sur lequel on ente quatre ou cinq sapins, pour composer vn gros masts.
* Meulette est l'estomach d'vn poisson.
Miroir, est vn lieu sur la gallerie, où est la Tutelle & Dieu-conduit du nauire, sçauoir l'image du Patron, duquel il porte le nom.
Mitraille, est toute sorte de vieux cloux, & autre ferraille, dont on se sert pour charger des pierriers.
Morte eau, est le plus bas de l'eau, tel qu'est le 7. & 22. de la Lune.
Morte saison, est le temps que la practique cesse.
* Moulinet, est vn morceau de bois tourné, & qui est enchassé sur deux barrots de la chambre de S. Barbe, à trauers lequel passe la barre ou leuier qui va donner dans le Timon.
Moüiller, signifie jetter l'ancre en mer, pour y sejourner, s'y rafraischir, ou faire autre chose.
Mouse en Hollande, est vn garçon ou page de nauire.
Nauire en Italien Naue, en Espagnol Nao.
Nocher, voyes Maistre.
Nord, signifie le mesme que Sepentrion.
Ocean, est ce grand amas d'eaux qui enuironnent toute la terre.
Oevures de marée, est le radoub ou calfat, qui se donne au fond du vaisseau eschoüé sur les vases, pendant que la marée est basse, à quoy les seuls Charpentiers experimentez doiuent trauailler.
Oeuures vifues, sont toutes les parties d'vn Nauire, depuis la Quille iusqu'à la Lisse du vibord: celes qui sont depuis le vibord iusques en haut, se nomment œuures mortes: Il n'y a que les seuls Charpentiers qui puissent trauailler aux œuures vifues.
* Osset ou ossec, est proprement la plus longue queuë ou crochet de toutes les varengues enculas qui se pose sur la quille, tout proche la courbe de talon: Et dautant que c'est en ce lieu où se met la pome de l'arriere, on l'appelle Ossec ou centine, ce lieu où toutes les eaux du nauire vont se rendre.
* Ouacher le gouuernail, est pousser le timon à tienbord ou à basbord. Il estoit à nostre ouache, veut dire nous l'auons laissë derriere nous.
Ostrelins, les Anglois appellent de ce nom tous ceux qui sont Orientaux, à l'Angleterre & specialement les Hanseatiques, ou Villes confederées d'Allemagne, dont la capitale est Lubec, & la seconde Hambourg.
* Ouardes sont certaines planches de bois, taillées en forme de grands semelles, qui sont attachées de costé & d'autre sur les bords des Heus, qu'on abaisse en l'eau allant à la bouline, de peur que le vaisseau n'enter trop auant en l'eau de ce costé là.
Pacsis ou pacsi, signifie la grande voile du grand mast, ou du mast de Borcet, nommant l'vn le grand pacsis, & l'autre pacsis de borcet.
Pages, sont les petits garçons qui sont dans le Nauire pour le nettoyer, monter aux perroquets, & seruir aux Matelots.
Palans, sont cordes attachées à l'esté, ou au tiers de la grande vergue, dont on se sert pour enleuer poinçons & bales de marchandise: Il y en a vn à chaque bord d'ordinaire en nos costes, les palans sont attachez sous le bloc d'Issas. * Les Latins le nomment Ductarius funis vel rudens cymba sensilis aut molienda in nauim alicuius rei.
Pantocheres, sont cordes qui trauersent les Haubans d'vn bord à l'autre, afin que lors que le grand temps le vaisseau roule, les Haubans d'vn bord soustiennent & soulagent les Haubans de l'autre bord, & l'vn roidisse l'autre, qui se lasche du costé que tombe le vaisseau: de là en plusieurs endroits on ne les nomme que du mot commun de Rides des Haubans.
Palanguines, sont cordes qui soustiennent les vergues par les deux quartiers, pour les soulager & defendre contre les coups de vent.
Panne, mettre en panne: c'est faire pancher vn vaisseau sur vn bord auec ses voiles pour estancher quelque voye d'eau, qui se trouuera de l'autre bord, du costé que vient le vent.
Parcloses, sont deux pieces du serrage qui ioignent la calingue de part & d'autre.
Passagers, sont ceux qui payant fret pour le port de leurs personnes & hardes, en Leuant on les nomme pelerins.
Pataches, sont vaisseaux pour le seruice des grands Nauires, & pour faire descouuertes & harceler l'ennemy.
Pauillon, est vn estendart posé au haut d'vn mast, lequel part sa couleur, figure & situation fait connoistre la nation, & condition de celuy qui commande dans le vaisseau.
Pelardeaux, sont pieces de planches couuertes de bourre, de poix & bray, dont on se sert pour boucher les escubiers ou quelque trou que le canon ennemy aura fait, on se sert toutefois plus souuent de plaques de plomb.
Pauiers, se prennent le plus souuent pour vne toile que l'on tend tout au tour du Nauire sur les extremitez des alonges & du vibord & autour des hunes, & ce aux iours de Feste & d'alegresse, ou durant le combat: ces pauiers seruent comme de parapet, afin que l'ennemy ne descouure le monde qui est sur le pont: souuent aussi on le prend pour les bords du vaisseau qui seruent comme de peribole ou gardefou. Es beaux vaisseau, ils se font de bonne frise d'escarlatte.
Permes, sont gondoles dont on se sert à Constantinopel pour passer à Galata.
Perroquet sur l'Ocean, est l'arbre de la seconde hune de quelque mast: à Marseille on le nomme papafique.
Pesnes, sont certains bouchons de coton ou laine attachez ou bout d'vn baston pour suifuer; goudranner, & brayer vn Nauire: le manche ou baston s'appelle baston à vadel.
Philibots, sont vaisseau Flamands, qui ont le bord arrondy sans aucune escarissure à la pouppe, les bastiments de Hambourg sont pareils, & de vieux temps se nomment Wielboth Hamburgeois.
* Pieter vn Nauire, est marquer sur l'estable & l'Estanbord de pied en pied la hauteur à plomb, qu'il y a depuis la quille afin de connoistre le tirant d'eau du Nauire. c'est à dire combien le Nauire enfonce de pieds dans l'eau, & s'il est en tonture en sa Carquaison, c'est à dire, voir s'il est esgalement chargé, & s'il enfonce plus le l'auant que de l'arriere, pour le pieter il faut faire vne equerre par le moyen d'vn plomb qu'on laisse deualer du haut du dernier Digon ioignant l'estable, & de la quille produite à l'infini, & diuiser cette hauter perpendiculaire de pied en pied & la marquer sur l'estable, le mesme se doit entendre de l'Estanbord.
* Pille, est le nom des 5. ou 6. derniers pieds d'vne ligne dont on pesche la moruë, sçauoir cette partie de corde qui est comprise entre l'hain & le plomb qui le fait deualer en bas.
Pillage, est la despouille des coffres, hardes & habits de l'ennemy pris, & l'argent qu'il a sur la sa personne iusques à trente liures; butin est le reste & le gros de la prise: pour l'ordinaire toutesfois ces deux mots se confondent.
Pile, en ancien Gaulois signifie vn Nauire.
* Pilon, est vne petite Escore.
Pilote dans vn vaisseau, est celuy qui commande à la route: Action de pilotage s'intente par les Pilotes qui conduisent & pilotent les Nauires, specialeme[n]t les estrangers pour les mettre dãs le Havre.
Pinasses, sont petits vaisseaux longs, estroits, forts & legers, propres à faire course ou descendre du monde en vne coste: ils sont faits de Pin pour l'ordinaire: les Bajonnois s'en seruent fort, tant à la voile qu'à la rame.
Plage, est vn riuage de basse mer, qui n'a assez d'eau & de fonds, afin que les vaisseaux y puissent aborder.
Poinct d'vne voile, est le coin d'embas d'vne coile, auquel sont attachez les escoutes.
Pointer vne Carte, est trouuer dans la Carte le poinct, & l'endroit, auquel on se persuade qu'est arriué le Nauire.
Poisson vert, qui est seulement sallé.
Poisson sec, qui est sallé & seché.
* Poitrine de gabord est le remplassement du bois retiré des aculements & egorgements de varengues & genoüils.
Police d'assurance, est vn contract, par lequel le Marchand répond du vaisseau au Bourgeois: ou bien vn contract, par lequel on promet indemnité & assurance des choses qui sont transportées par mer de païs en autre au moyen de tant pour cent, qu l'asseuré paye à son asseureur, quand le Nauire est de retour.
Pont, c'est le Tillac d'enhaut percé de treillis & ouuert par quarreaux pour euaporer la fumée de l'artillerie, donner iour en bas: on le fait fois de corde.
Pomelle, est le dé des treuiers qu'ils ont à la paume de leur main.
Porques, sont grosses pieces de bois, qu'on met sur le plat & les genouils des vaisseaux de guerre pour les fortifier.
Portage, aurtement dit l'Ordinaire, est la faculté que chaque Officier ou Matelot, a de mettre pour soy dans le Nauire iusques au poids de tant de quintaux, ou tel nombre de barils.
* Pougent est le mesme que la poupe, hauteur & arriere d'vn vaisseau. C'est ainsi que nous disons ce vaisseau a vn beau pougent.
Pouger, est de grand temps auoir le vent derriere, ne portant que le borcet ou autre moindre voile.
Poulaine ou Bouline, est vne grosse fléche de bois appellée des Marseillois serpe, posée sur l'auan du Nauire sous le beaupré, en l'extremité de laquelle est la marque, qui donne le nom au vaisseau.
Qvart, est le temps que les Mariniers sont en faction: en France il est de trois heures & demie, en Angleterre de quatre, en Turquie de cinq.
Quarquéson, est la facture des marchandises chargées dans le vaisseau.
Quartiers Maistres, Quarteniers ou Compagnons de quartier, sont quatre Officiers qui commandent au trauail de l'equipage.
Querrat, est la partie exterieure du vaisseau, comprise entre la quille, & la premiere chainte.
Queste, est l'eslancement, que fait l'estable & l'estambord hors la Quille & corps du Nauire.
Quille ou Carene, est vne piece de bois qui regne tout en bas le long du Nauire; duquel elle est la longueur, la largeur, & le fondement.
Quille de pont, en quelques endroits est vne longue piece de bois qui soustient le pont.
Quintal, est vn poids de cent liures à quinze onces la liure.
Rabans, sont menuës cordes destinées à saisir & ferler les voiles.
* Rable est vne rouaneure ou entailleure qui se fait au coin de haut ou partie la plus haute de la quille, de l'estambord & de l'estable, pour y cloüer sur la quille les gabords, & sur l'estable & l'estambord la teste des planches du bordage. C'est en cetter rablure qui commencent les premieres planches ou gabords du bordage.
Radoub & Calfat, est remplir par force les fentes d'estoupes: souuent aussi il signifie tout ce qui est necessaire pour radouber vn vaisseau.
Raison ou ration, est la mesure du biscuit, pitance & boisson qui se distribuë à chacun dans le bord. Si on augmente la portion, on l'appelle double raison, à Dieppe on l'appelle l'Ordinaire.
Racquements, racques ou racage, sont boules de bois enfilée en forme de chapelet & grosses patenostres, qui accolent le mast, & la vergue, & seruent pour plus facilement hausser la vergue, on appelle ce chapelet la Trosse.
Rade, est vn lieu en mer propre à ancrer.
Resouloir, est vn appareil de canon qu'on employe à batre la poudre quand on charge la piece, le bout est rond de la grosseur de la bale, & long d'vn diametre; hampe ou le manche, est vne pique vn peu plus longue que la piece.
Repoux de fer, sont cheuilles de fer, dont on se sert pour repousser vne cheuille rompuë.
Remorguer, c'est tirer vn vaisseau apres soy.
Ribodage, est quand vn Nauire a esté endommage par vn autre, estans tous deux en flotte, ou changeant de place au quay: Action en estant intentée, le dommage se paye par moitié.
* Ridein, est vn petit valon ou espace du fond de la mer, qui est plus creux en vn lieu que n'est le sol & planure prochaine.
Rides, sont cordes mediocres, qui passantes par diuerses poulies, seruent à roidir les plus grosses cordes.
Rider, c'est lier bien ferré, ou faire roidir vne corde.
Reclamper vn mast rompu ou antenne, est le racommoder.
Represailles, sont lettres que le Roy accorde, quand hors la guerre, les subjets de diurse obeïssance, ont pillé sur les subjets, & que par voye de iustice ordinaire, droit ne leur est fait.
Raques, sont boules de bois, attachées aux haubans, par dedans lesquelles passent des Manœuures courants, de peur qu'elles ne s'empeschent les vnes les autres.
Ruche en quelques hauvres, signifie le corps d'vn vaisseau tout nud & destitué de masts & cordages. * Nudum nauigij cadauer.
Sabords, sont les portaux, fenestres & embraseures, par lesquelles sort la bouche du canon.
* Safran est vne piece de bois qu'on attache au gouuernail pour l'alargir, lors que le vaisseau ne se sent pas assez du gouuernail.
Scoue, est l'extremité de la varengue, qui se courbe doucement pour s'enter & marier auec le Genoüil.
Seine, est vn instrument; dont on se sert pour pescher. * ou bien vn ré qui a deux brasses & demie de probond & 22. brasses de long.
Serpez, voyez Harpons.
Sept de Drisse, est vne piece de bois, au pied du grãd mast, dans laquelle sont deux roüets de poulie, par lesquels passe la drisse ou corde, sur laquelle on hale la grande vergue, on le nõme aussi Bloc Dusas.
Serrage, est vn lambris interieur de grosses planches, qu'on met en dedans dessus les couples ou costez d'vn vaisseau pour le doubler.
Siuadiere, est la voile du Beaupré.
* Sommiers de la pouleine seruent à tenir ferme les herbes auec de digon.
Soute ou Paillo, est le lieu où se garde le Biscuit, il y en a aussi parfois où l'on met les Poudres.
* Sustain, est vn demy tillac qui se prend depuis la deuanture de la chambre iusques au grand mast quand on ne veut faire vn pont tout entier, & qu'on laisse Bregne ou Breche en belle, c'est à dire vne distance vuide pour vne promenade à iour, & depuis le belle iusques au mast d'auant, l'on fait vn faint anbinet qui est encore vne autre partie de tillac.
Syrtes, sont des lieux, qui à cause des sablons, agitez par la mer, tantost dissipés, & tantost amoncelez, sont fort perilleux à ceux qui nauigent.
Talinguer les cables, c'est l'anneau de l'Ancre, estant bien garny, passer le cable dedans, & mettre sur le bord.
Talon, est l'extremité de la quille, sur laquelle est posé l'Estambord.
* Tangage est le souleuement que la vague donne à vn vaisseau.
Tanqueurs, sont Gabarriers, qui portent à bord les marchandises, & du bord à terre, & dans les Ordonnances signifie ceux qui se mettent en l'eau, & apportent à terre sur leurs espaules les hommes & leurs hardes, ou de terre dans le basteau, lors qu'il ne peut approcher de terre.
Taquer, est vne cheuille de bois à deux branches, cloüée par le milieu sur les bords d'vn vaisseau, pour y amarer quelque manœuvre.
Tenir le largue, c'est se seruir de tous vents, qui sont depuis le vent de costé, iusques au vent de derriere inclusiueme[n]t.
Temps, grand temps, signifie temps fascheux, lors que la mer est agitée de quelque tempeste.
Temps fin, est lors que l'Horison est pur & net de vapeurs, comme lors qu'il gele.
* Tesure est vn assemblage de 40. ou 50. rez.
Teste de More voyez Bloc.
* Teu est vne espece de Dome que les pescheurs de Terre-neuue mettent sur le baril, dans lequel ils sont pour pescher la moruë, & les garentir des pluiers, & brunes que sont presque continuelles sur le grand banc.
Tienbord, signifie le costé d'vn Nauire, qui est la main droite d'vn homme, qui estant en pouppe, regarde la prouë; Sur la Mediterranée on dit d'Estribord, Pogé, à main droite.
Tillacs, sont les planchers, & diuers estages d'vn Nauire.
Tirefoing, est vn appareil de Canon, fait de deux subtiles verges de fer, pliés en tours de Serpent, & enmanchés au bout d'vne hampe ou pique, lequel sert pour tirer le bondon qu'on met dans la piece apres la charge, quand on la veut descharger sans la tirer.
Tonneau, signifie sur mer, entre les François, vn poids de deux mil liures, à seize onces la liure.
* Tonture, sont les premieres planches qui se posent par dehors du vaisseau au dessus du franc tillac.
* Touletiere sont pieces de bois appliquées sur le vibord d'vn basteau de nef sur lequelles appauient les rames.
* Toulets, sont deux cheuilles de bois posées sur la Touletiere contre lesquels on appuie la rame.
Traineaux, sont instruments de pesche, deffendus par l'Ordonnance.
Treuiers, sont ceux qui font les voiles.
* Trinquette, est vn voile taillé en tiers poinct en forme de voile latine qu'on met de beau temps le long du grand esté, auquel elle est iointe par le moyen d'vn faux esté auec des cordelettes qu'on ginde en haut par son issas, & qu'on gouuerne en bas selon le vent auec escoute. Sur la Mediterranée on dit aussi Trinquet de Gabie ou de Hune, pour le second arbre, enté sur le maistre mast.
Trisses, sont cordes, qui seruent à auancer, reculer ou amarer vn canon.
Trosse, voyes Racquements.
Tonnine, sur la Mediterranée, est de la chair d'vn poisson nommé Ton.
Toüeus, est vn petit ancre qu'on jette lors qu'on veut, par le moyen de la corde qui luy est attachée, à force d'hommes & du Cabestan, faire auancer vn Nauire, ou le changer de lieu, cette action s'appelle Toüer.
Varangues, ou Madiers, sont des chevrons de bois, entés & rangez par interualles, de trauers, & à angle droit, entre la quille, & la calingue à guise des costes de l'espine du dos, lesquelles selon qu'elles sont longues ou courtes, sont que le vaisseau à beaucoup ou peu de plat.
Varander, signifie esgouter, & secher le harang, & le mettre en estat d'estre mis en caque.
Varech, signifie tout ce que la mer pousse à bord par tourmente ou fortune de mer.
Vent, pasier au dessous du vent deuant quelque vaisseau, & le falüer de son canon, est marque de grand respect, & soumisson.
* Vent alize, vent dize arresté d'vn costé.
* Vent d'amont c'est le Nordest & l'Est.
* Vent d'aual c'est le Sud-ouest & l'Ouest.
* Vent forain est le Sud-est & le Sud.
* Vent Marouest & le Norouest & le Nord.
Vergue, voyes Antene.
Verges de beile, veut dire verges de surcroist.
* Vertenelles sont pentures qui soustienne[n]t le gouuernail en estat sur l'estanbord, & luy laissent son mouueme[n]t libre.
Vibord, est la derniere lisse qui se met sur l'extremité des alonges.
Vif de l'eau, c'est lors que les marées sont les plus hautes, ce qui arriue deux fois le mois.
Virer, ce mot est vsité, au lieu de tourner, comme virer vn vaisseau, virer au Cabestan.
Vireuaud ou guindeau, est vn gros essieu de bois, dont les extremitez sont apuyées aux deux bors des extremitez d'vn Nauire, qu'on tourne à force de leuiers de haut en bas, pour leuer l'Ancre ou autre chose.
Voguauant, est celuy des Espaliers, qui tient la queuë de chaque rang, qui donne le branle à la rame, & aux rameurs, ses compagnons.
Vouguer sur la Mediterranée, signifie ramer.
Voiles, sont plusieurs laises de toile de diuerse grandeur & forme, tenduës aux atenes des Nauires, pour recueillir le vent necessaire à la nauigation.
Voiles, prenent leur difference, & denomination des masts, & vergues, ausquelles elles seruent.
Voiles ferlées, veut dire pliées sous la verge: deferlées, abatües, & separées de la verge.
Voile Latine, ou oreille de Lievre, est vne voile qui porte l'vn de ses angles, dressé en haut en oreille de Lievre.
Volte, prendre telle volte, est le mesme que prendre quelque route ou tourner & virer diuersement vn vaisseau pour se dresser au combat.
Yeux de bœuf, sont deux trous par lesquels passe l'Itacle de Beaupré.
Yeux de pie, c'est ainsi que se nomment les trous quisont au bas de la grande voile, pour y boutonner les bonnettes.
Transcribed by Lars Bruzelius.
Sjöhistoriska Samfundet | The Maritime History Virtual Archives | Etymology | Search.
Copyright © 1998 Lars Bruzelius.